Ad Completorium
per dies Dominicas II (Dominicas) et sollemnitates et Triduum Paschale et octavam Paschæ (excepto die Sabbati post Pascha; dies Dominicas I per die Sabbati post Pascha est), vel per omnes dies.
Intoductio
Deus, in adiutórium meum inténde.
Dómine, ad adiuvándum me festína.
Glória Patri et Fílio*
et Spirítui Sancto.
Sicut erat in princípio et nunc et semper*
et in sǽcula sæculórum.
Amen.
[Allelúia.]
Omitte in Quadragesima
Conscientiæ Discussio
Fratres, ad finem huis diéi perdúcti, agnoscámus peccáta nostra.
Confíteor Deo omnipoténti et vobis, fratres et sorores,
quia peccávi nimis
cogitatióne, verbo, ópere et omissióne:
Mea culpa, mea culpa, mea máxima culpa.
Ideo precor beátam Maríam semper Vírginem,
omnes Angelos et Sanctos,
et vos, fratres et sorores, oráre pro me
ad Dóminum Deum nostrum.
Misereátur nostri omnípotens Deus
et, dimíssis peccátis nostris,
perdúcat nos ad vitam aetérnam.
Amen.
Hymnus
A die 17 usque ad 23 decembris, et ab Epiphania ad Festum Baptismatis Domini, et per hebdomada Quadragesimae II, IV, et VI (Hebdomadam Sanctam):
Christe, qui, splendor et dies,
noctis tenébras détegis,
lucísque lumen créderis,
lumen beátis prædicans,
Precámur, sancte Dómine,
hac nocte nos custódias;
sit nobis in te réquies,
quiétas horas tríbue.
Somno si dantur óculi,
cor semper ad te vígilet;
tuáque dextra prótegas
fidéles, qui te díligunt.
Defénsor noster, áspice,
insidiántes réprime,
gubérna tuos fámulos,
quos sánguine mercátus es.
Sit, Christe, rex piíssime,
tibi Patríque glória,
cum Spíritu Paráclito,
in sempitérna sæcula. Amen.
Per Pascha:
Iesu, redémptor sæculi,
Verbum Patris altíssimi,
lux lucis invisíbilis,
custos tuórum pérvigil:
Tu fabricátor ómnium
discrétor atque témporum,
fessa labóre córpora
noctis quiéte récrea.
Qui frangis ima tártara,
tu nos ab hoste líbera,
ne váleat sedúcere
tuo redémptos sánguine,
Ut, dum graváti córpore
brevi manémus témpore,
sic caro nostra dórmiat
ut mens sopórem nésciat.
Iesu, tibi sit glória,
qui morte victa prænites,
cum Patre et almo Spíritu,
in sempitérna sæcula. Amen.
Per ceteras:
Te lucis ante términum,
rerum creátor, póscimus,
ut sólita cleméntia
sis præsul ad custódiam.
Te corda nostra sómnient,
te per sopórem séntiant,
tuámque semper glóriam
vicína luce cóncinant.
Vitam salúbrem tríbue,
nostrum calórem réfice
tætram noctis calíginem
tua collústret cláritas.
Præsta, Pater omnípotens,
per Iesum Christum Dóminum,
qui tecum in perpétuum
regnat cum Sancto Spíritu.
Amen.
Ps 90:1-16
Per Pascha: Allelúia, allelúia, allelúia.
Per ceteras: Alis suis obumbrábit tibi; non timébis a timóre noctúrno.
Qui hábitat in protectióne Altíssimi,*
sub umbra Omnipoténtis commorábitur.
Dicet Dómino:†
"Refúgium meum et fortitúdo mea,*
Deus meus, sperábo in eum".
Quóniam ipse liberábit te de láqueo venántium*
et a verbo malígno.
Alis suis obumbrábit tibi,†
et sub pennas eius confúgies;*
scutum et loríca véritas eius.
Non timébis a timóre noctúrno, a sagítta volánte in die,†
a peste perambulánte in ténebris,*
ab extermínio vastánte in merídie.
Cadent a látere tuo mille†
et decem mília a dextris tuis;*
ad te autem non appropinquábit.
Verúmtamen óculis tuis considerábis,*
et retributiónem peccatórum vidébis.
Quóniam tu es, Dómine, refúgium meum.*
Altíssimum posuísti habitáculum tuum.
Non accédet ad te malum,*
et flagéllum non appropinquábit tabernáculo tuo,
quóniam ángelis suis mandábit de te,*
ut custódiant te in ómnibus viis tuis.
In mánibus portábunt te,*
ne forte offéndas ad lápidem pedem tuum.
Super áspidem et basilíscum ambulábis*
et conculcábis leónem et dracónem.
Quóniam mihi adhǽsit, liberábo eum;*
suscípiam eum, quóniam cognóvit nomen meum.
Clamábit ad me, et ego exáudiam eum;†
cum ipso sum in tribulatióne,*
erípiam eum et glorificábo eum.
Longitúdine diérum replébo eum*
et osténdam illi salutáre meum.
Glória Patri et Fílio*
et Spirítui Sancto.
Sicut erat in princípio et nunc et semper*
et in sǽcula sæculórum.
Amen.
Per Pascha: Allelúia, allelúia, allelúia.
Per ceteras: Alis suis obumbrábit tibi; non timébis a timóre noctúrno.
Ap 22:4-5
Vidébunt fáciem Dómini, et nomen eius in fróntibus eórum. Et nox ultra non erit, et non egent lúmine lucérnæ neque lúmine solis, quóniam Dóminus Deus illuminábit super illos, et regnábunt in sǽcula sæculórum.
Responsorium Breve
Per die Cenæ Domini et Passionis Domini et Sabbati Sanctum:
Christus factus est pro nobis obœ́diens usque ad mortem [, mortem autem crucis]. Per Passionis Domini et Sabbatum Sanctum [Propter quod et Deus exaltávit illum, et dedit illi nomen, quod est super omne nomen.]. Per Sabbatum Sanctum
Per octavam Paschæ:
Hæc dies quam fecit Dóminus: exsultémus et lætémur in ea, allelúia.
Per ceteras:
In manus tuas, Dómine, comméndo spíritum meum.
[Alleluia, alleluia.]
Per Pascha
In manus tuas, Dómine, comméndo spíritum meum.
[Alleluia, alleluia.]
Per Pascha
Redemísti nos, Dómine Deus veritátis.
In manus tuas, Dómine, comméndo spíritum meum.
[Alleluia, alleluia.]
Per Pascha
Gloria Patri et Filio et Spiritui Sancto.
In manus tuas, Dómine, comméndo spíritum meum.
[Alleluia, alleluia.]
Per Pascha
Canticum
Salva nos, Dómine, vigilántes, custódi nos dormiéntes, ut vigilémus cum Christo et requiescámus in pace. [Alleluia.] Per Pascha
Nunc dimíttis servum tuum, Dómine,*
secúndum verbum tuum in pace,
quia vidérunt óculi mei*
salutáre tuum,
quod parásti*
ante fáciem ómnium populórum,
lumen ad revelatiónem géntium*
et glóriam plebis tuæ Israel.
Glória Patri et Fílio*
et Spirítui Sancto.
Sicut erat in princípio et nunc et semper*
et in sǽcula sæculórum.
Amen.
Salva nos, Dómine, vigilántes, custódi nos dormiéntes, ut vigilémus cum Christo et requiescámus in pace. [Alleluia.] Per Pascha
Oratio
Per dies Dominicas II (Dominicas):
Orémus. Vox nostra te, Dómine, humíliter deprecétur, ut, domínicæ resurrectiónis hac die mystério celebráto, in pace tua secúri a malis ómnibus quiescámus, et in tua resurgámus laude gaudéntes. Per Christum Dóminum nostrum.
Amen.
Per sollemnitates:
Vísita, quǽsumus, Dómine, habitatiónem istam, et omnes insídias inimíci ab ea longe repélle; ángeli tui sancti hábitent in ea, qui nos in pace custódiant; et benedíctio tua sit super nos semper. Per Christum Dóminum nostrum.
Amen.
Noctem quiétam et finem perféctum concédat nobis Dóminus omnípotens.
Amen.
Antiphona Finalis ad Beatam Mariam Virginem
Ab Adventu ad Festum Purificationis Beatissimae Mariae Virginis:
Alma Redemptóris Mater, quæ pérvia cæli
porta manes, et stella maris, succúrre cadénti,
súrgere qui curat, pópulo: tu quæ genuísti,
natúra miránte, tuum sanctum Genitórem,
Virgo prius ac postérius, Gabriélis ab ore
sumens illud Ave, peccatórum miserére.
A Festo Purificationis Beatissimae Mariae Virginis ad Pascha:
Ave, Regína cælórum,
ave, Dómina angelórum,
salve, radix, salve, porta,
ex qua mundo lux est orta.
Gaude, Virgo gloriósa,
super omnes speciósa;
vale, o valde decóra,
et pro nobis Christum exóra.
A Pascha ad Pentecosten:
Regína cæli, lætare, allelúia,
quia quem meruísti portáre, allelúia,
resurréxit sicut dixit, allelúia.
Ora pro nobis Deum, allelúia.
A Pentecoste ad Adventum:
Salve, Regína, Mater misericórdiæ:
vita, dulcédo, et spes nostra, salve.
Ad te clamámus, éxsules, filii Hevæ.
Ad te suspirámus, geméntes et flentes
in hac lacrimárum valle.
Eia ergo, advocáta nostra, illos tuos
misericórdes óculos ad nos convérte.
Et Iesum, benedíctum fructum ventris tui,
nobis post hoc exsílium osténde.
O clemens, o pia, o dulcis Virgo María.